🚨 वडझरी जनआंदोलनाला उस्फूर्त प्रतिसाद; उपोषणात नागरिक मोठ्या संख्येने सहभागी! 🚨

संगमनेर तालुक्यातील वडझरी खुर्द येथे सुरू असलेल्या बेकायदेशीर खाण व स्टोन क्रेशर विरोधातील आंदोलनाला आता व्यापक लोकसमर्थन मिळत असून ग्रामस्थ मोठ्या संख्येने उपोषणात सहभागी होत आहेत. वंचित बहुजन आघाडीचे तालुका कार्याध्यक्ष गोरख भानुदास जगताप यांनी प्रशासनाला दिलेल्या निवेदनानंतरही कारवाई न झाल्याने ग्रामस्थांमध्ये संतापाची लाट उसळली आहे.

ग्रामपंचायत हद्दीतील गट क्रमांक ३४ मधील खाणकाम व जोरदार ब्लास्टिंगमुळे परिसरातील घरांना तडे, विहिरींचे पाणी कमी होणे, शेतीपंप बंद पडणे, जनावरांच्या आरोग्यावर परिणाम आणि नागरिकांच्या जीवितास धोका निर्माण झाल्याचा आरोप आंदोलनकर्त्यांनी केला आहे. अनेक शेतकरी व नागरिकांनी उपोषण स्थळी उपस्थित राहून आंदोलनाला जाहीर पाठिंबा दिला.

“गाव उद्ध्वस्त करणारे खाण व क्रेशर तात्काळ बंद करा, अन्यथा आंदोलन आणखी तीव्र करू!” असा इशारा ग्रामस्थांनी प्रशासनाला दिला आहे. विशेष म्हणजे महिलांचा व युवकांचा सहभागही मोठ्या प्रमाणात दिसून येत असून संपूर्ण तळेगाव निमोण परिसरात या आंदोलनाची जोरदार चर्चा सुरू आहे.

प्रशासनाकडून वारंवार निवेदने घेऊनही ठोस कारवाई होत नसल्याने ग्रामस्थांमध्ये तीव्र नाराजी असून “लोकप्रतिनिधी आणि अधिकाऱ्यांचे खाणसम्राटांना अभय?” असा सवालही उपस्थित केला जात आहे.

📰 ज्ञानगंगा | संपादक – श्री शरद गोर्डे पाटील (बी.जे. पुणे)
🌐 Dnyangangaa.com