By 
पावसाच्या खंडाने खरीप हंगाम संकटात; पीक विमा, नुकसानभरपाई, वीज-पाणी आणि चारा प्रश्नांवर तातडीच्या उपाययोजनांचे निर्देश
संगमनेर, दि. २४ :
पावसाने दिलेल्या खंडामुळे संगमनेर तालुक्यातील खरीप हंगाम संकटात सापडला असून, अनेक भागांत सोयाबीन पिकाची अवस्था गंभीर झाली आहे. महिन्यांच्या मेहनतीनंतर हातातोंडाशी आलेले पीक पावसाअभावी सुकू लागल्याने शेतकऱ्यांच्या अपेक्षांवर पाणी फिरण्याची वेळ आली आहे. या पार्श्वभूमीवर कृषिमंत्री दत्तात्रय भरणे यांनी पिंपळे येथे थेट शेताच्या बांधावर जाऊन नुकसानग्रस्त सोयाबीन पिकाची पाहणी केली.
शेतकरी सोपान चकोर यांच्या शेतात जाऊन कृषिमंत्र्यांनी पिकाची प्रत्यक्ष पाहणी केली. पावसाअभावी सोयाबीन पिकाचे झालेले नुकसान त्यांच्या निदर्शनास आले. यावेळी त्यांनी शेतकऱ्यांशी संवाद साधत शासन त्यांच्या पाठीशी खंबीरपणे उभे असल्याची ग्वाही दिली.
मात्र, शेतकऱ्यांसमोर आता एकच महत्त्वाचा प्रश्न आहे—पिकाची पाहणी झाली, मदतीची ग्वाही मिळाली; पण प्रत्यक्ष मदत शेतकऱ्यांपर्यंत कधी पोहोचणार?
पीक विम्याच्या अडचणी तातडीने सोडवा
पिंपळे गावातील शेतकऱ्यांनी पीक विम्याच्या अडचणी कृषिमंत्र्यांच्या निदर्शनास आणून दिल्या. त्याची तातडीने दखल घेत कृषी आणि महसूल विभागाने चालू खरीप हंगामात याबाबत त्वरित कार्यवाही करावी, असे निर्देश कृषिमंत्री भरणे यांनी दिले.
नुकसान झाल्यानंतर शेतकऱ्याला पीक विमा मिळणे हा त्याच्या आर्थिक पुनर्बांधणीतील महत्त्वाचा आधार ठरू शकतो. त्यामुळे विमा प्रक्रियेत अडथळे असल्यास ते दूर करून पात्र शेतकऱ्यांना वेळेत लाभ मिळणे आवश्यक आहे.
शेतकऱ्यांच्या बांधावरच शासन पोहोचावे
दुष्काळसदृश परिस्थितीमुळे शेतकऱ्यांची स्वप्ने भंग पावली आहेत. अशा कठीण परिस्थितीत शेतकऱ्यांना कार्यालयांच्या फेऱ्या मारायला लावण्याऐवजी प्रशासनानेच त्यांच्या बांधावर जाऊन परिस्थितीची पाहणी करावी, असे निर्देश कृषिमंत्र्यांनी दिले.
शेतीबरोबरच पशुधन, चारा आणि पाणीटंचाई या प्रश्नांवरही तातडीने उपाययोजना करण्याच्या सूचना देण्यात आल्या आहेत.
वीज-पाण्याचा प्रश्नही गंभीर
पाऊस कमी असताना उपलब्ध पाण्याचा वापर करून पिके वाचविण्यासाठी शेतकऱ्यांना वीजपुरवठा अत्यंत महत्त्वाचा आहे. मात्र वीजपुरवठ्याच्या अडचणी निर्माण झाल्यास सिंचनाचे नियोजन कोलमडते.
शेतकऱ्यांना वेळेत पाणी देता यावे यासाठी डीपी आणि ट्रान्सफॉर्मर योग्य वेळी उपलब्ध करून देण्याच्या सूचना महावितरण विभागाला देण्यात आल्या आहेत.
अहिल्यानगर जिल्ह्यात खरीप पिकांची स्थिती चिंताजनक
जिल्हा अधीक्षक कृषी अधिकारी सुधाकर बोराळे यांनी जिल्ह्यातील पेरणी आणि पीक परिस्थितीचा आढावा सादर केला.
जिल्ह्यात सोयाबीनची ११३.०३ टक्के पेरणी झाली असून पीक सध्या शेंगा भरण्याच्या संवेदनशील अवस्थेत आहे. पाण्याच्या ताणामुळे शेंगा चपटी राहणे, दाणे बारीक राहणे आणि हलक्या जमिनीवरील पीक सुकण्याची शक्यता आहे.
मक्याची १६३.३४ टक्के, तुरीची १३४.३२ टक्के, कपाशीची ९१.६६ टक्के, खरीप बाजरीची ६३.८३ टक्के, उडदाची ६१.४५ टक्के, तर मुगाची ४७.८३ टक्के पेरणी झाली आहे.
कपाशीची वाढ खुंटली असून पाती व फुलांची गळ होत आहे. काही ठिकाणी रसशोषक किडी आणि गुलाबी बोंडअळीचा प्रादुर्भाव दिसून येत आहे. मक्याच्या उत्पादनाच्या वजनात घट होण्याची शक्यता असून पावसाच्या खंडामुळे बाजरीचे पीकही सुकण्याची परिस्थिती निर्माण झाली आहे.
‘मी स्वतः शेतकरी; शेतकऱ्यांच्या वेदना जाणतो’
पिकाची पाहणी करताना कृषिमंत्री भरणे यांनी आपण स्वतः शेतकरी असल्याने शेतकऱ्यांच्या अडचणी आणि वेदना समजून घेत असल्याचे सांगितले. नुकसानग्रस्त शेतकऱ्यांना शासनाच्या माध्यमातून उपलब्ध असलेली मदत देण्यासाठी प्रशासनाने सक्रियपणे काम करण्याचे निर्देश त्यांनी दिले.
केंद्र शासनाच्या आपत्ती व्यवस्थापन विभाग आणि राज्य शासनाच्या मदत व पुनर्वसन विभागाच्या माध्यमातून नुकसानग्रस्त शेतकऱ्यांना मदत करण्यासाठी शासनस्तरावर अधिसूचना लवकरच निर्गमित होणार असल्याचेही त्यांनी स्पष्ट केले.
आता शेतकऱ्यांचे लक्ष प्रत्यक्ष मदतीकडे
कृषिमंत्र्यांनी शेताच्या बांधावर जाऊन नुकसानाची पाहणी केल्याने शेतकऱ्यांना दिलासा मिळाला आहे. मात्र आता शेतकऱ्यांना अपेक्षा आहे ती पंचनामे, पीक विमा, नुकसानभरपाई, वीज-पाणी, चारा आणि शासकीय योजनांचा प्रत्यक्ष लाभ वेळेत मिळण्याची.
शेताच्या बांधावर कृषिमंत्री पोहोचले आहेत; आता प्रशासनानेही त्याच बांधावर मदत घेऊन पोहोचावे, हीच नुकसानग्रस्त शेतकऱ्यांची अपेक्षा आहे.
