🌾 शेतकरी बांधवांनो, आपण कोणाशी लढतोय? 🌾

चांदोह येथील शेतकऱ्यांच्या भांडणाचा व्हिडिओ पाहून मन हेलावून गेले. एकेकाळी गावात एखाद्या शेतकऱ्याच्या घरात संकट आले तर संपूर्ण गाव धावून जायचे. आज मात्र बांध, रस्ता आणि जमिनीच्या वादातून शेतकरीच शेतकऱ्याच्या विरोधात उभा ठाकलेला दिसतो आहे.

खरं पाहिलं तर आज शेतकरी सर्व बाजूंनी संपत चालला आहे. बियाणे, खते, औषधे, मजुरी, वीज, इंधन यांचे दर गगनाला भिडले आहेत. लाखो रुपये खर्च करून पिकवलेला माल बाजारात नेल्यावर त्याला योग्य भाव मिळत नाही. कधी दुष्काळ, कधी अवकाळी पाऊस, कधी गारपीट तर कधी पूर यामुळे वर्षभराची मेहनत काही तासांत मातीमोल होते.

अनेक शेतकरी कर्जाच्या ओझ्याखाली दबलेले आहेत. मुलांचे शिक्षण, मुलींचे लग्न, घरखर्च आणि शेतीचा वाढता खर्च यामुळे शेतकऱ्याची आर्थिक घडी विस्कटली आहे. शेतीत राबणाऱ्या हातांची संख्या कमी होत आहे. तरुण पिढी शेतीपासून दूर जात आहे. अनेक गावांमध्ये शेती करणे परवडेनासे झाले आहे.

अशा परिस्थितीत आपणच आपल्याशी भांडलो तर शेतकऱ्यांचा आवाज कोण ऐकणार?

ज्या व्यवस्थेकडे शेतकऱ्यांच्या प्रश्नांकडे पाहायला वेळ नाही, जिथे शेतमालाला हमीभाव नाही, जिथे शेतकऱ्यांना न्यायासाठी आंदोलने करावी लागतात, त्या व्यवस्थेविरुद्ध एकजूट होण्याऐवजी आपण बांधावरून एकमेकांचे डोके फोडत आहोत, ही दुर्दैवी शोकांतिका आहे

आज गावोगावी शेतकऱ्यांचे बांध तुटत नाहीत, तर माणुसकीचे बांध तुटत आहेत. जमिनीचे वाद न्यायालयात सोडवता येतील, बांध पुन्हा घालता येतील, रस्ते पुन्हा काढता येतील; पण नाती तुटली तर ती जोडणे कठीण असते.

शेतकरी मित्रांनो, आज गरज आहे ती एकतेची. कारण उद्या पिकाला भाव मिळवण्यासाठी, अन्यायाविरुद्ध लढण्यासाठी, पाणी, वीज आणि हक्कांसाठी आंदोलन करायचे असेल तर आपल्यालाच एकत्र उभे राहावे लागणार आहे.

लक्षात ठेवा…

“शेतकऱ्याचा खरा शत्रू शेजारचा शेतकरी नाही; शेतकऱ्याला संपवणारी उदासीन व्यवस्था, वाढता खर्च आणि कमी भाव हेच खरे संकट आहे.”

चला, बांधावरून भांडण नको, तर शेतकऱ्यांच्या प्रश्नांवर एकत्र येऊया. कारण…

🚜 “शेतकरी वाचला तरच शेती वाचेल, आणि शेती वाचली तरच देशाचे भविष्य सुरक्षित राहील.” 🌾

✍️ शरद गोर्डे पाटील
संपादक – साप्ताहिक ज्ञानगंगा
Dnyangangaa.com