🚨 एकाच रस्त्याला दोनदा मंजुरी, भूमिपूजनही झाले; तरीही रस्ता सापडेना ! वडझरी–तिगाव–पारेगाव रस्ता प्रकरणाने उभे केले गंभीर प्रश्न 🚨

शासनाचा निधी कुठे गेला? मंजूर रस्ते सोडून

काम तिसरीकडे कसे? ग्रामस्थ संतप्त; उच्चस्तरीय चौकशीची मागणी

वडझरी बु. | ज्ञानगंगा प्रतिनिधी

संगमनेर तालुक्यातील वडझरी बु., तिगाव आणि पारेगाव परिसरातील रस्ते विकासाच्या नावाखाली सुरू असलेल्या कारभारामुळे प्रशासन, सार्वजनिक बांधकाम विभाग, ग्रामपंचायती आणि लोकप्रतिनिधी यांच्या कार्यपद्धतीवर गंभीर प्रश्नचिन्ह निर्माण झाले आहे. एकाच मार्गावरील रस्त्यांसाठी कोट्यवधी रुपयांच्या मंजुऱ्या, भूमिपूजन समारंभ, निविदा प्रक्रिया आणि पाठपुरावा झाल्याचे अधिकृत नोंदीत दिसत असताना प्रत्यक्षात रस्त्याची अवस्था मात्र बदललेली नसल्याने ग्रामस्थांमध्ये तीव्र संताप व्यक्त होत आहे.

विशेष म्हणजे, वडझरी–तिगाव रस्त्यास सुमारे १ कोटी रुपयांची मंजुरी मिळाली, त्यानंतर वडझरी–पारेगाव रस्त्यालाही मुख्यमंत्री ग्राम सडक योजना टप्पा-२ अंतर्गत मंजुरी मिळाली; मात्र प्रत्यक्षात मंजूर मार्गांवर काम कुठेही झाले नाही आणि काही कामे तिसऱ्याच ठिकाणी सुरू असल्याचे ग्रामस्थांचे म्हणणे आहे. त्यामुळे या संपूर्ण प्रकरणाची सखोल चौकशी व्हावी, अशी मागणी आता जोर धरू लागली आहे.

---

वडझरी–तिगाव रस्त्यास १ कोटींची मंजुरी

तिगाव ते वडझरी बु. (डी.जी. मा. 269) या महत्त्वाच्या मार्गाच्या मजबुतीकरण व डांबरीकरणासाठी सार्वजनिक बांधकाम विभागामार्फत अंदाजे १ कोटी रुपयांचा निधी मंजूर करण्यात आला होता.

या कामाचे ११ ऑक्टोबर २०२४ रोजी मोठ्या उत्साहात भूमिपूजन करण्यात आले. भूमिपूजन फलकावर राज्यातील वरिष्ठ मंत्री, खासदार, आमदार आणि सार्वजनिक बांधकाम विभागाच्या अधिकाऱ्यांची नावे झळकत होती. त्यामुळे परिसरातील नागरिकांमध्ये आनंदाचे वातावरण निर्माण झाले होते.

शेतकरी, विद्यार्थी, दूध उत्पादक, व्यापारी आणि सर्वसामान्य नागरिकांसाठी हा रस्ता जीवनवाहिनी मानला जात असल्याने लवकरच दर्जेदार रस्ता उपलब्ध होईल, अशी अपेक्षा व्यक्त केली जात होती.

---

वडझरी–पारेगाव रस्त्यासही स्वतंत्र मंजुरी

यानंतर वडझरी खुर्द–पारेगाव बु. रस्ताही मुख्यमंत्री ग्राम सडक योजना टप्पा-२ अंतर्गत मंजूर करण्यात आला.

शासनाच्या अधिकृत कागदपत्रांनुसार या मार्गाला स्वतंत्र प्रशासकीय मान्यता देण्यात आली आहे. त्यामुळे परिसरातील दोन महत्त्वाच्या मार्गांच्या विकासासाठी शासनाने निधी उपलब्ध करून दिल्याचे स्पष्ट झाले.

परंतु या दोन्ही मंजुऱ्यांनंतरही प्रत्यक्षात नागरिकांना अपेक्षित दर्जाचा रस्ता मिळालेला नाही.

---

भूमिपूजन झाले; पण काम पूर्ण कुठे?

भूमिपूजनाला अनेक महिने उलटून गेले तरी तिगाव–वडझरी रस्त्याचे कुठेही काम पूर्ण झाल्याचे दिसून येत नाही, असा आरोप ग्रामस्थांकडून करण्यात येत आहे.

ग्रामस्थांच्या म्हणण्यानुसार, मंजुर रस्ता सोडून दुसरीकडे काम झाले असल्याची चर्चा असुन त्यासाठी रीतसर परवानगी घेतली होती का?मूळ मंजूर रस्त्याची संपूर्ण अवस्था आजही अपूर्ण आहे. अनेक ठिकाणी रस्ता खराब अवस्थेत असून नागरिकांना त्रास सहन करावा लागत आहे.

यामुळे गावात आता उपरोधिक स्वरात एकच चर्चा सुरू आहे—

“नारळ फुटला, फलक लागले, फोटोसेशन झाले; पण रस्ता नेमका कुठे गेला?”

---

ग्रामपंचायतीचे अधिकृत पत्रही समोर

या प्रकरणातील आणखी एक महत्त्वाचा दस्तऐवज म्हणजे ग्रामपंचायत वडझरी बु. यांनी दिनांक २० जानेवारी २०२५ रोजी दिलेले अधिकृत पत्र.

या पत्राद्वारे संगमनेर विधानसभा मतदारसंघाच्या आमदारांकडे रस्त्याच्या उर्वरित कामासाठी पाठपुरावा करण्याची मागणी करण्यात आली होती.

पत्रात नमूद करण्यात आले आहे की –

कामाची निविदा प्रक्रिया पूर्ण झाली आहे.

कार्यारंभ आदेश देण्यात आला आहे.

काही भागाला प्रधानमंत्री ग्रामसडक योजनेअंतर्गत मंजुरी मिळाली आहे.

मात्र उर्वरित रस्त्याचे काम पूर्ण होणे आवश्यक आहे.

या पत्रामुळे रस्त्याचे संपूर्ण काम अद्याप पूर्ण झाले नसल्याचे संकेत अधिकृत पातळीवरूनही मिळत असल्याची चर्चा सुरू झाली आहे.

---

मग काम सुरू कुठे झाले?

या संपूर्ण प्रकरणातील सर्वात गंभीर प्रश्न म्हणजे शासनाने मंजूर केलेले रस्ते एकीकडे असताना प्रत्यक्षात काही कामे तिसऱ्याच मार्गावर सुरू असल्याचा ग्रामस्थांचा आरोप आहे.

यामुळे नागरिकांमध्ये अनेक प्रश्न निर्माण झाले आहेत.

मंजूर रस्त्यांचे नेमके काय झाले?

मूळ प्रस्तावित मार्गांवर काम का झाले नाही?

कामाचा मार्ग बदलला असेल तर त्यासाठी कोणती प्रशासकीय मान्यता घेण्यात आली?

कोणत्या आदेशानुसार काम दुसरीकडे वळविण्यात आले?

या प्रश्नांची उत्तरे अद्याप स्पष्ट झालेली नाहीत.

---

ग्रामपंचायतींची भूमिकाही संशयाच्या भोवऱ्यात

ग्रामस्थांच्या मते, शासनाने मंजूर केलेल्या रस्त्यांवर काम होत नसेल तर संबंधित ग्रामपंचायतींनी आक्रमक भूमिका घेणे अपेक्षित होते.

मात्र प्रत्यक्षात तशी भूमिका दिसून आली नाही.

काही शिफारशी, पत्रव्यवहार किंवा स्थानिक दबावामुळे मूळ मंजूर कामांऐवजी इतर कामांना प्राधान्य देण्यात आले का, अशी चर्चा परिसरात सुरू आहे.

---

सार्वजनिक बांधकाम विभागावरही प्रश्न

सार्वजनिक बांधकाम विभागाकडे सर्व मंजुऱ्यांची आणि प्रस्तावांची माहिती असताना प्रत्यक्ष कामाचे नियोजन वेगळ्या दिशेने कसे गेले, हा देखील मोठा प्रश्न आहे.

जर मंजूर रस्ता एक आणि प्रत्यक्ष कामाचा मार्ग दुसरा असेल, तर त्यासाठी कोणती कायदेशीर प्रक्रिया राबविण्यात आली?

संबंधित अधिकाऱ्यांनी याबाबत कोणते निर्णय घेतले?

याबाबत विभागाकडून अद्याप स्पष्ट माहिती समोर आलेली नाही.

---

लोकप्रतिनिधींच्या भूमिकेवरही प्रश्नचिन्ह

रस्त्यांच्या मंजुरीवेळी श्रेय घेणारे लोकप्रतिनिधी आता या प्रश्नावर मौन का बाळगत आहेत, असा सवाल ग्रामस्थ विचारत आहेत.

मंजूर रस्त्यांवरील काम रखडले असताना त्याबाबत पाठपुरावा का झाला नाही?

कामाचा मार्ग बदलला असेल तर त्याची माहिती लोकप्रतिनिधींना होती का?

या सर्व प्रश्नांची उत्तरे नागरिक मागत आहेत.

---

शरद गोर्डे यांचे पालकमंत्र्यांना निवेदन

या संपूर्ण प्रकरणाची गंभीर दखल घेत ज्ञानगंगाचे संपादक व सामाजिक कार्यकर्ते शरद गोर्डे यांनी महाराष्ट्र राज्याचे जलसंपदामंत्री तथा अहिल्यानगर जिल्ह्याचे पालकमंत्री मा. ना. राधाकृष्ण विखे पाटील यांना निवेदन सादर केले आहे.

निवेदनामध्ये पुढील प्रमुख मागण्या करण्यात आल्या आहेत :

✅ मंजूर निधीचा संपूर्ण तपशील जाहीर करावा.
✅ प्रत्यक्षात किती काम झाले याचा अहवाल प्रसिद्ध करावा.
✅ अपूर्ण कामासाठी जबाबदार अधिकारी व ठेकेदारांवर कारवाई करावी.
✅ उर्वरित रस्त्याचे काम तातडीने पूर्ण करावे.
✅ कामाच्या दर्जाची स्वतंत्र तांत्रिक चौकशी करावी.
✅ मंजूर रस्ते आणि प्रत्यक्ष सुरू असलेल्या कामांची सखोल चौकशी करावी.

---

“आंधळं दळतंय, कुत्रं पीठ खातंय” – ग्रामस्थांचा संताप

एकाच मार्गासाठी दोनदा मंजुरी, भूमिपूजन, निविदा, कार्यारंभ आदेश आणि ग्रामपंचायतीचा पाठपुरावा असूनही नागरिकांना आजही पूर्ण दर्जेदार रस्ता मिळालेला नाही.

त्यामुळे ग्रामस्थांमध्ये प्रचंड नाराजी असून गावात आता एकच चर्चा सुरू आहे—

“आंधळं दळतंय, कुत्रं पीठ खातंय!”

शासन निधी मंजूर करते, विकासाच्या घोषणा होतात, फलक लागतात; मात्र प्रत्यक्ष लाभ जनतेपर्यंत पोहोचत नाही, अशी भावना नागरिक व्यक्त करत आहेत.

---

🔴 परिसरातील ग्रामस्थांचा प्रशासनास सवाल¹

🔹 तिगाव–वडझरी रस्त्याच्या १ कोटींच्या मंजुरीचे नेमके काय झाले?
🔹 वडझरी–पारेगाव रस्त्याचे काम अद्याप पूर्ण का झाले नाही?
🔹 भूमिपूजनानंतरही रस्ता अपूर्ण का आहे?
🔹 मंजूर रस्ते सोडून काम तिसऱ्याच ठिकाणी कसे सुरू झाले?
🔹 ग्रामपंचायत, सार्वजनिक बांधकाम विभाग आणि लोकप्रतिनिधी यापैकी जबाबदार कोण?
🔹 विकासाच्या नावाखाली जनतेची दिशाभूल होत आहे का?
🔹 मंजूर निधीचा संपूर्ण हिशोब जनतेसमोर कधी येणार?

आज वडझरी, तिगाव आणि पारे गाव परिसरातील नागरिकांना आश्वासनांची नाही, तर स्पष्ट उत्तरांची गरज आहे. प्रशासनाने या प्रश्नांची उत्तरे देत वस्तुस्थिती जनतेसमोर आणावी, अशी नागरिकांची मागणी आहे.

✍️ शरद गोर्डे पाटील
संपादक – ज्ञानगंगा
📞 9623416734 | 9370940491
“जनतेच्या प्रश्नांना वाचा फोडणारे ज्ञानगंगा “

1. ↩︎